Mükəmməl dua. Müəllif: Tamerlan Məhərrəmov

 

                                                                                        

                                                MÜKƏMMƏL DUA

Bu hadisəni eşidəndə mən də xeyli gülmüşdüm oxucum.Yəqin sən tək gülməklə kifayətlənməyəcəksən,həm də nəticə çıxaracaqsan.

Keçmiş zamanlarda bir obada Zeynəb adlı qarı vardı.Onun gözünün ağı-qarası bir inəyi vardı.Bu inək ildə bir dəfə bala verərdi.İndi də bala vermişdi.Ancaq inək Zeynəb qarıya imkan vermirdi ki,onu sağsın.Zeynəb qarı çox əlləşdi,çox tər tökdü,inək ipə-sapa yatmadı ki,yatmadı.

Əlac qalır kəndin axunduna...Axundun evi uzaq olduğundan Zeynəb qarı qonşu Əli kişi ilə 5 abbası axunda pul yollayası olur ki,inəyə dua yazsın,bəlkə inəyin ürəyinə insaf gələ..

 Vaxt vədə yetir,duanı Əli kişi gətirib təhvil verir ki,al Zeynəb qarı,as inəyin boynundan.Zeynəb qarı duanı inəyin boğazından asdıqdan sonra inək ipə-sapa yatır,həlimləşir.Zeynəb qarı inəyin ilk südünü axunda hədiyyə yollamaqla bərabər,öz təşəkkürün də çatdırır ki,axund sağ olsun,onun sayəsində inək insan dili bilir,duası inəyi yumşaldıb.Südü alan axund qarıya ismarıc yollayır ki,bəs Zeynəb qarı mən dua,falan yazmamışam.Ümumiyyətlə,nədən danışdığından xəbərsizəm.

Zeynəb qarı əlacsız qalıb duanı inəyin boynundan açıb içərisin oxuyası olur.İçərisində bunlar yazılmışdı:

                                                   Duanı yazdı Əli ağa

                                                  İnək imkan verə

                                                   Zeynəb inəyi sağa

Sən demə pulu alan Əli kişi pulu xərcləmiş,ağ kağıza axundun əvəzinə öz üç sətir yazıb Zeynəb arvada qaytarmışdır.

 

                                                                                                                         19/noyabr/2018

                                                                                                                                      22:45